Jam 3 | MCQ | STEP | Vwehu nune veje ja ea mapoka najahi'ina pare'avara. Ja nihena kavuja'ina'e nú ea ka'ene ija'inijija ni'ima'ura'e eha sisea apehuna.

James 3

Mitarijina

1 Vwehu nune veje ja ea mapoka najahi'ina pare'avara. Ja nihena kavuja'ina'e nú ea ka'ene ija'inijija ni'ima'ura'e eha sisea apehuna. 2 Ijihuna'e nú ea maho'o 'unama ani ani'ini tachinamie arihura. 'Enavo ea pina hura ira ka'ene 'waramujino paasusamujaho hu ea arira. 'Ena'omo hu huni haha ori'ini 'ajoarahuna arerina. 3 'Ena'omo nú iviamaa hosia puni iri vaji 'auria irechamiakame vu'ataa hejura re'avajaho nú puni hahiji 'u'o maho'o 'eke ura arini irechamihuna. 4 Heha! Sisima ijija 'u'o mama'ina kaivo hwasisia mama'inapo 'ani'eju'e va'ura. Ija'ina'e sisima 'ajohi'inijara unenu pina ma'u'ui veju'e sisima ichá'ina hu ura renuja'ina'e va'una. 5 'Ene 'u'o mitarijaho haha pwinana'a ma'u'ua kaivo uneunecha mama'ina kehi kehi 'waramuna. Heha! Nechi'a ni'ima'ura kaivo vena ma'u'ui 'ejanavu'e rena va'una. 6 'Ene mitariji 'u'o vene 'ee sisea huni tinia. 'Ene mitarijara haha pwinana'a maho'o ruarahuna. 'Ene mitari jihuni harura sisea kajaho veni renuni kwaa ijino rena rou'e 'waramuna. 7 Ijihuna'e hanuha ani ani'ina uka tapara 'ee uneunecha ka'ene mwe'i tiroha oji'ina sohanuha ijija emaapo 'uninamie 'ajohaura. 8 'Enakaivo ei pini huni mitara hami 'ajohe sonama nahuna areri pana. Ijaho niho'o sisea ka'ene siheria pa'ana ka'ene maka puna'i 'aninamiu ja'ina itu'ona namu. 9 Ijí mitara nikwisu kajino nú núni Natohwa 'ee Oma ta'arohura. 'Ene ijí mitara nikwisu kajino nú ea ka'ene Godi vare'ina'e venajija siripavura. 10 'Ene ira nikwisu'ina kajino merajihujaho 'warame 'ee siripavujaho 'waravura. Vwehu nune ike uneunechakija 'unama ija'ina pave'avara. 11 'Ú toa úja mamaijaho toa siseiji'i ahume rouna raka? 12 Vwehu nune matakapo tavo'a rejura raka? 'Ene aja 'ahi mataka 'ina irima navura raka? 'Ene soha areri toa maa re'ena raka?

Vwiha Maa Ichutoi Rena Roujina

13 'Ú ea irara joni vajakaho vwiha hami vwihaji'ine 'ee hena kama paraji'ine? Maka'eje hu huni kara mamaijino vene masuani vwiha mamaijino najahama. 14 'Enakaivo ja niho'o senama parane 'ee joni ojijihuni ura ijiru vwihaji'ina'e re'avajaho pakehi kehi ve'avara. Kehi kehi vejujaho sisea ni'ima'ura ka'ene nimaiji'i ninakaravi'inijina. 15 Vwiha ijá kajaho ichutoi rena rohuna pana kaivo ijaho mwe'a kehuna 'ee haha huni 'unama 'ee 'avena sisea puna'i rena roura. 16 Ijihuna'e ichihichakaro oja sisesa vwihane 'ee ajiname 'ee puni ura ijino pupusu vwihajujipo navujaho sisea ani ani'ina kihune 'ee uneunecha ura arini panahuna. 17 'Enakaivo mamaa ka'ene ichutoi rena roujija ikehina. Amurijaho ariramaa'e matauvi'ine masuani ajuaravi'ine hami vwihaji'ine numisarai rarena paraji'ine kara mamaa'e 'ee karokaha paveji'ina. 'Enakúne pa'aro'aroti namine choichoi pameji'ina'e re'avara. 18 'Ene matauma hihuna 'waravi'inijipo matauma hihuna 'waravu'e roe ariramaa'e rejura.